奧巴馬終於獲選侯任總統啦, 全世界都對佢有無限既寄望, 而且觀察佢有咩奇招.. 回想佢當選一刻, 我剛巧在飯堂睇住電視食飯, 我覺得好感動呀!

首先, 係奧巴馬當選, 令美國既黑人帶來左轉變, 雖然美國一直都聲稱佢地以美國精神, 黎維繫同吸納不同人種既地方, 但係種族歧視一直只有嚴重下去, 雖然美國黑人知道奧巴馬選左出黎唔會有即時既轉變, 但係黑人總統加上奧巴馬和平共融既風格, 就足以令人有信心佢既帶領下, 係唔會因膚色而有偏袒, 所以黑人感動既情緒特別激動, 可見美國黑人一直被打壓同受歧視既情況.

第二, 見到黑人總統奧巴馬一家, 連同白人副手一家上台, 一家大細有老有嫩, 能夠一同於台上分享成功喜悅, 景象正正就係黑人同白人最理想既共融氣氛, 就好似說明左美國精神係一個包容的國家. 我見到呢個圖畫, 都好感動, 有少少眼泛淚光..

第三, 美國對全球經濟既影響好大, 所以全世界都對佢既政策抱觀望態度, 而奧巴馬既形象積極, 著重經濟, 以及幕後有效率同實力既智囊團, 令人好奇佢地會有乜計仔, 因為對我都好有影響.

最後, 就係全球軟實力方面, 美國對中國及全世界既外交政策, 以及國防方面態度等等,, 對其他國家有乜影響?

奧巴馬係近年一個好風雲既人物, 佢既政治魅力就一定係好勁, 能夠羸過幕後有克林頓撬腰既希拉莉, 再嬴埋其他共和黨票倉州份既選民, 加上二年選戰既毅力, 能由名氣不太既下風逆轉成為人所難忘既上風, 重有, 佢可以召集到多方人才, 以及有能力籌到有史以來最多既選舉經費, 睇住佢一路以積極同務實既態度, 聰明及熱愛和平既性格, 一路咁推出有優勢既宣傳, 相信佢個人係好唔簡單.

但係, 除左經濟之外, 我希望佢, 同埋呢個世界, 都可以關注到另一個世界性既議題, 就係全球暖化既問題. 尋晚睇新聞, 見到總理溫家寶, 向各國呼籲關注及聯手對策呢個問題, 真係令我好感動. 同時, 陳志雲響無線台慶鉅獻"冰天動地"既特輯中, 關注到同樣問題, 令我真係再反思到, 急促既人類發展對環境及氣候既影響.

現時天文台已經估計, 到2030年就會無冬天, 只係短短幾十年, 教科書就要改哂, 第時香港既細路唔單止可能未見過雞, 重可能連冬天係點都唔知. 真係好心痛呢個地球, 而且破壞環境既害處, 係會由我地既下一代來承受.

我尋日返工突然有一個感動, 就係為奧巴馬, 溫家寶呢d 咁有理想既領導祈禱.